സൂപ്പർതാരങ്ങളെ മറികടന്ന് മുഹമ്മദ് സാല

ആരും പ്രവചിച്ചിരുന്നതല്ല മുഹമ്മദ് സാലയുടെ സീസണിലെ അസാധാരണ പ്രകടനം. സീസണിൽ ഇതുവരെ എല്ലാ മത്സരങ്ങളിൽ നിന്നുമായി 40 ​ഗോളുകളാണ് ഈജിപ്ഷ്യൻ സൂപ്പർ താരം അടിച്ചുകൂട്ടിയത്. ഇനിയും ആറ് മത്സരങ്ങൾ അവശേഷിക്കേ സാലയുടെ ​ഗോളടി എവിടെച്ചെന്നവസാനിക്കുമെന്ന ആകാംക്ഷയിലാണ് ആരാധകർ.സീസണിലിതുവരെ 45 മത്സരങ്ങളിൽ നിന്ന് 40 ​ഗോളുകളാണ് സാല സ്വന്തമാക്കിയത്. സാലയുടെ ഈ പ്രകടനം മറികടന്നത് 16-ഓളം സൂപ്പർ സ്ട്രൈക്കർമാരുടെ കരിയറിലെ ഏറ്റവും മികച്ച സീസൺ പ്രകടനങ്ങളെയാണെന്നത് ശ്രദ്ധേയമാണ്. തിയറി ഹെന്റി, ആന്ദ്രേ ഷെവ്ചെങ്കോ, ദിദിയർ ദ്രോ​ഗ്ബ, വെയിൻ റൂണി, സാമുവൽ ഏറ്റു, അലെസാന്ദ്രോ ദെൽ പിയറോ, ഫിലിപ്പോ ഇൻസാ​ഗി, സെർജിയോ അ​ഗ്യൂറോ, ​ഗെബ്രിയേൽ ബാറ്റിസ്റ്റ്യൂട്ട, ഫ്രാൻസിസ്കോ ടോട്ടി തുടങ്ങിയ സൂപ്പർ സ്ട്രൈക്കർമാരെയാണ് സീസണിൽ സാല മറികടന്നത്.

2003-04 സീസണിൽ ആഴ്സനലിൽ കളിക്കുമ്പോൾ തിയറി ഹെന്റി നേടിയത് 39 ​ഗോളുകളായിരുന്നു. 2000-01 സീസണിൽ എ.സി മിലാനിൽ കളിക്കുമ്പോൾ യുക്രൈൻ താരം ഷെവ്ചെങ്കോ അടിച്ചുകൂട്ടിയത് 34 ​ഗോളുകളായിരുന്നു. 2010-11 സീസണിൽ ഇന്റർ മിലാനിൽ കളിക്കുമ്പോഴായിരുന്നു എറ്റുവിന്റെ ​ഗോൾവേട്ട, അന്ന് 37 ​ഗോളുകളായിരുന്നു ഏറ്റുവിന്റെ സംഭാവന. പ്രമുഖ താരങ്ങളെയെല്ലാം ​ഗോളടിയിൽ മറികടന്ന സാല ഇക്കുറി ​ഗോൾ വേട്ടയിൽ അർധശതകം തികയ്ക്കുമോയെന്ന് കാത്തിരുന്ന് കാണാം.